کل ہند طرحی نعتیہ مشاعرہ بموقع عرس قاضی حسن علیہ الرحمہ قاضی ٹولہ تروارہ سیوان

 کل ہند طرحی نعتیہ مشاعرہ بموقع عرس قاضی حسن علیہ الرحمہ قاضی ٹولہ تروارہ سیوان 

احمد شرفی پوکھریروی مدرس مدرسہ قاضی حسن انوارالعلوم قاضی ٹولہ تروارہ سیوان

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مصرع طرح 

,,نہ مٹا ہے نہ مٹے گا کبھی چرچا تیرا,,

رشک فردوس نہ ہو کیسے مدینہ تیرا 

اس میں واقع ہے شہا گنبد خضرا تیرا

شعر کہنے کا سلیقہ میرے آقا دیدے

تاکہ لکھتا رہوں دن رات قصیدہ تیرا

قاسم رزق ہے تو حاکم خِلقت تو ہے

بادشاہ ہو کہ گدا کھاتا ہے ٹکڑا تیرا

سارے نبیوں کا ہوا مسجد اقصیٰ میں امام

کتنا اونچا کیا اللہ نے رتبہ تیرا

وجہ تخلیق جہاں توہی ہے پھر کیا کہنا

از زمیں تا بہ فلک سب تو ہے صدقہ تیرا

صرف مخلوق نہیں رب بھی ہے تیرا ذاکر

,, نہ مٹا ہے نہ مٹے گا کبھی چرچا تیرا,, 

تیرا احسان حسن کون بھلا پائے گا

فیض جاری ہے یہاں آج بھی شاہا تیرا

ہر کوئی در پہ ترے آیا ہے امید لیے 

خالی جائے نہ یہاں سے کوئی منگتا تیرا

تیرے ہی زیر کرم جیتے ہیں گاوں والے

اے مرے قاضی حسن سب پہ ہے سایہ تیرا 

تو سخی ابن سخی ابن سخی ابن سخی 

صاحب جود و کرم سارا گھرانہ تیرا

اپنے شرفی پہ کرم کردے طفیل حسنین 

دیکھ لے یہ بھی کبھی شہر مدینہ تیرا

نتیجئہ فکر: احمد شرفی پوکھریروی مدرس مدرسہ قاضی حسن انوارالعلوم قاضی ٹولہ تروارہ سیوان